Tathmini Shirikishi ya Athari na Hatari zinazosababishwa na Majanga yatokanayo na mabadiliko ya Tabianchi (PACDR)

Katika dunia inayokumbwa na athari zinazoongezeka za mabadiliko ya tabianchi, jamii nyingi –hasa vijijini – zinabeba mzigo mkubwa wa majanga kama ukame, mafuriko, au upungufu wa mazao. Ili kujenga jamii thabiti zinazoweza kukabiliana na changamoto hizi, kuna haja ya kutumia mbinu shirikishi, zinazowawezesha watu wenyewe kutambua hatari zinazowakabili na kupanga mikakati ya kukabiliana nazo.Hapa ndipo Zana ya Tathmini Shirikishi ya Athari na Hatari za Mabadiliko yaTabianchi (PACDR) inapokuja kwa umuhimu mkubwa.

PACDR ni nini?

PACDR (Participatory Assessment of Climate and Disaster Risks) ni mwongozo unaowezesha jamii kutathmini hatari za tabianchi na majanga katika mazingira yao, huku wakishiriki kikamilifu kwenye mchakato wa kufanya maamuzi. Kwa kutumia mbinu hii, jamii hutambua maeneo hatarishi, vyanzo vya hatari, na njia bunifu za kujilinda dhidi ya athari hizo.

Kwa nini PACDR ni muhimu?

• Inawapa sauti watu wa kawaida – badala ya wataalam kupanga kwa     niaba yao, PACDR inahusisha wanajamii katika kila hatua ya tathmini na     upangaji
• Inatoa mwongozo rahisi na wa     vitendo kwa wawezeshaji – haikuhitaji teknolojia ngumu wala utaalamu     mkubwa, bali hutegemea ushirikiano na maarifa ya ndani ya jamii.
• Hutoa matokeo yanayoweza kutumika     moja kwa moja katika miradi ya maendeleo, mipango ya serikali za mitaa, au     programu za taasisi mbalimbali.‍
• Inaambatana na viambatisho vya     kina vinavyotoa taarifa za kisayansi, hadithi halisi za mafanikio, na     vyanzo vya maarifa zaidi vinavyopatikana mtandao

Mafanikio Halisi

Katika maeneo ambayo PACDR imetumika, kumeshuhudiwa ongezeko la uelewa wa jamii kuhusu mabadiliko ya tabianchi, kuimarika kwa ushiriki wa wanawake na makundi ya pembezoni katika kupanga maendeleo, pamoja na kubuniwa kwa mikakati bunifu ya kukabiliana na majanga.Hadithi hizi si tu zinaleta matumaini, bali pia zinathibitisha kuwa mabadiliko yanawezekana yakitoka kwa jamii yenyewe.

Soma zaidi kuhusu tathmini Shirikishi ya Athari na Hatari zinazosababishwana majanga yatokanayo na mabadiliko ya tabianchi (PACDR) HAPA